GINGOOG CITY — Nakigpulong si City Mayor Erick G. Canosa ug Vice Mayor Peter M Unabia sa mga miyembro sa Corn Growers sa dakbayan arun madungog ang kasamtangang sitwasyon ug mga panginahanglanon sa mga mag-uuma. Gipahigayon ang maong panagtigom sa Fortunato Building, adlaw’ng Biyernes, Oktubre 2, 2020.
Gipaabot sa mga corn growers ang mga panginahanglanon sa ilang pagpananom, lakip na niini ang abuno, corn dryer, tractor, galingan sa mais, mga high breed seeds ug uban pa. Gehisgutan usab ang tiknikal nga aspeto kabahin sa pag pananom sa mais, pag kondisyon sa yuta ug pagpalig-on sa kahibalo sa mga teknolohiya nga makatabang sa pagdevelop sa industriya sa mais.
Matod pa ni Vice Mayor Peter M. Unabia “Gearing towards Progress nani, nag sugod na ang pag uswag sa Agrikultura hilabi na sa panginabuhian sa mga mag-uuma.” Nagpahinumdom usab kini sa importansya sa disiplina sa matag mag-uuma arun maningkamot kini nga gamiton og tarong ang bisan unsang assistance nga madawat niini arun mas mapauswag ang kahimtang niini. Sa pagkakaron, adunay 466 ka myembro sa Corn Farmers Association sa Gingoog ug hisayran nga sa kinatibuk-an, adunay 420 ka hektarya sa mais sa tibuok dakbayan.
Mitambong sa maong panagpulong si City Mayor Erick G. Cañosa, Vice Mayor Peter M. Unabia, Agriculture Consultant Mr. Jun Ayensa, Agricultural Center II Chief sa Provincial Operation Center Ms. Nilda B. Salas, Acting Asst. Department Head sa City Agriculturist’s Office Mr. Ram Shurab Landiza, ug mga corn farmers sa dakbayan.
