GINGOOG CITY — Nagmalampuson ang Orientation ug Contract Signing sa 156 ka mga IP Scholars sa dakbayan nga gipahigayon sa Fortunato Building, adlaw’ng Martes, Oktobre 6, 2020. Ang maong kalihokan gipanghingusgan sa lokal nga pangagamhanan arun mahibaloan sa mga scholars kun unsa ang ilang madawat nga suporta gikan sa gobyerno lakip na usab ang pagpahinumdum kanila sa ilang mga responsibilidad isip iskolar sa dakbayan.
Kahibaloan nga sa tuig 2019, 94 ka mga estudyante nga miyembro sa Higaonon Tribe ang nahatagan og Scholarship Grant nga P15,000.00 matag semester gikan sa Scholarship Program Fund. Karon School Year 2020-2021, adunay dugang 62 ka mga 1st year college students ang nahatagan sa parehong pribilehiyo. Gihatagan og hugot nga suporta sa lokal nga pangagamhanan ang maong programa tungod kay pinaagi niini, dako nga oportunidad ang napaabot sa mga kabatan-onang lumad nga makab-ot ang ilang mga pangandoy sa kinabuhi ug matabangan niini ang ilang pamilya ug komunidad sa umaabot.
Malipayon usab nga gipahibalo ni City Mayor Erick G. Cañosa ug Vice Mayor Peter M. Unabia nga adunay gigahin nga 10M nga budget para sa pagtukod sa Balay Tulogan para sa estudyanteng miyembro sa Higaonon Tribe ug 50M para sa Gingoog City Dormitory para sa mga Dumagat, mga estudyante nga nagpuyo sa Hinterland areas sa dakbayan, ug mga less privileged nga estudyante. Mapasalamaton usab ang CU Administration sa hugot nga suporta nga nadawat niini gikan sa buhatan ni Cong. Christian M. Unabia arun mahatagan og katumanan ang maong mga proyekto.
Nitambong sa maong kalihokan si Mayor Erick G. Cañosa, Vice Mayor Peter M. Unabia, ABC President Robert J. De Lara, Board Member Erik Khu, City Administrator Mr. Elvin Y. Restituto, Chief of Staff Ms. Melleanette Mercado, Ms. Rose Marie Abutan ug mga IP Scholars sa dakbayan.
