GINGOOG CITY –Atol sa selebrasyon sa World Teachers’ Day, nagpahigayon ang lokal nga pangagamhanan ug pormal nga pagturn-over sa 39 ka photocopying machines ug 4 ka duplicating machine (risograph) alang sa buhatan sa Department of Education-Gingoog City Division isip suporta sa Modified Learning System nga pagagamiton sa panahon sa pandemya. Nahitabo ang turn-over adlaw’ng Lunes, Oktubre 5, 2020 sa City Hall Grounds.
Nigahin og 3.5M nga budget sa Local School Board ilalum sa Special Education Program ang kasamtangang administrasyon arun mapaabot ug mahatag niini ang uban pang panginahanglanon sa DepEd sama sa paspas ug malahutayon nga makinarya para sa pag-andam sa mga modules. Kini nagtumong nga matabangan ang mga magtutudlo nga makahatag og maayong kalidad sa edukasyon bisan paman nga bag-o na ang pamaagi sa sistema sa pagtudlo ug pagtuon aron malikay ang mga estudyante og magtutudlo sa hulga sa COVID19.
Malaumon ang CU Administration nga pinaagi sa maong photocopying ug duplicating machines, magpadayon ang paghatag og dekalidad nga edukasyon sa mga lumulupyo sa dakbayan bisan og anaa ra kini nagtuon sulod sa ilang panimalay. Mapasalamaton usab ang kasamtangang administrasyon sa padayon nga sakripisyo ug dedikasyon sa mga magtutudlo alang sa kaayuhan sa mga estudyante.
Anaa sa maong kalihokan si City Mayor Erick G. Cañosa, Kag. Evelyn G. Cañosa, Kag. Judeline I. Bernaldez, Kag. Jerome G. Mercado, Kag. Roy E. Aniscal, Hon. Kag. Winfred T. Militante, Jr., ABC President Robert de Lara, City Administrator Mr. Elvin Y. Restituto, inubanan sa presensiya sa mga representante sa DEPED Gingoog Dr. Jesnar Dems S. Torres, Schools Division Superintendent, Dr. Mary Ann M. Allera, Assisstant Schools Division Superintendent ug Mr. Sherwin A. Cuerdo, Education Program Supervisor sa MAPEH.